|
|
|
|
|
|
Bhuvaneshvari Kavacham
भुवनेश्वरीकवचम्
श्रीगणेशाय नमः । देव्युवाच । देवेश भुवनेश्वर्या या या विद्याः प्रकाशिताः । श्रुताश्चाधिगताः सर्वाः श्रोतुमिच्छामि साम्प्रतम् ॥ १॥
त्रैलोक्यमङ्गलं नाम कवचं यत्पुरोदितम् । कथयस्व महादेव मम प्रीतिकरं परम् ॥ २॥
ईश्वर उवाच । श्रृणु पार्वति वक्ष्यामि सावधानावधारय । त्रैलोक्यमङ्गलं नाम कवचं मन्त्रविग्रहम् ॥ ३॥
सिद्धविद्यामयं देवि सर्वैश्वर्यसमन्वितम् । पठनाद्धारणान्मर्त्यस्त्रैलोक्यैश्वर्यभाग्भवेत् ॥ ४॥
ॐ अस्य श्रीभुवनेश्वरीत्रैलोक्यमङ्गलकवचस्य शिव ऋषिः , विराट् छन्दः , जगद्धात्री भुवनेश्वरी देवता , धर्मार्थकाममोक्षार्थे जपे विनियोगः । ह्रीं बीजं मे शिरः पातु भुवनेशी ललाटकम् । ऐं पातु दक्षनेत्रं मे ह्रीं पातु वामलोचनम् ॥ १॥
श्रीं पातु दक्षकर्णं मे त्रिवर्णात्मा महेश्वरी । वामकर्णं सदा पातु ऐं घ्राणं पातु मे सदा ॥ २॥
ह्रीं पातु वदनं देवि ऐं पातु रसनां मम । वाक्पुटा च त्रिवर्णात्मा कण्ठं पातु परात्मिका ॥ ३॥
श्रीं स्कन्धौ पातु नियतं ह्रीं भुजौ पातु सर्वदा । क्लीं करौ त्रिपुटा पातु त्रिपुरैश्वर्यदायिनी ॥ ४॥
ॐ पातु हृदयं ह्रीं मे मध्यदेशं सदावतु । क्रौं पातु नाभिदेशं मे त्र्यक्षरी भुवनेश्वरी ॥ ५॥
सर्वबीजप्रदा पृष्ठं पातु सर्ववशङ्करी । ह्रीं पातु गुह्यदेशं मे नमोभगवती कटिम् ॥ ६॥
माहेश्वरी सदा पातु शङ्खिनी जानुयुग्मकम् । अन्नपूर्णा सदा पातु स्वाहा पातु पदद्वयम् ॥ ७॥
सप्तदशाक्षरा पायादन्नपूर्णाखिलं वपुः । तारं माया रमाकामः षोडशार्णा ततः परम् ॥ ८॥
शिरःस्था सर्वदा पातु विंशत्यर्णात्मिका परा । तारं दुर्गे युगं रक्षिणी स्वाहेति दशाक्षरा ॥ ९॥
जयदुर्गा घनश्यामा पातु मां सर्वतो मुदा । मायाबीजादिका चैषा दशार्णा च ततः परा ॥ १०॥
उत्तप्तकाञ्चनाभासा जयदुर्गाऽऽननेऽवतु । तारं ह्रीं दुं च दुर्गायै नमोऽष्टार्णात्मिका परा ॥ ११॥
शङ्खचक्रधनुर्बाणधरा मां दक्षिणेऽवतु । महिषामर्द्दिनी स्वाहा वसुवर्णात्मिका परा ॥ १२॥
नैऋत्यां सर्वदा पातु महिषासुरनाशिनी । माया पद्मावती स्वाहा सप्तार्णा परिकीर्तिता ॥ १३॥
पद्मावती पद्मसंस्था पश्चिमे मां सदाऽवतु । पाशाङ्कुशपुटा मायो स्वाहा हि परमेश्वरि ॥ १४॥
त्रयोदशार्णा ताराद्या अश्वारुढाऽनलेऽवतु । सरस्वति पञ्चस्वरे नित्यक्लिन्ने मदद्रवे ॥ १५॥
स्वाहा वस्वक्षरा विद्या उत्तरे मां सदाऽवतु । तारं माया च कवचं खे रक्षेत्सततं वधूः ॥ १६॥
हूँ क्षें ह्रीं फट् महाविद्या द्वादशार्णाखिलप्रदा । त्वरिताष्टाहिभिः पायाच्छिवकोणे सदा च माम् ॥ १७॥
ऐं क्लीं सौः सततं बाला मूर्द्धदेशे ततोऽवतु । बिन्द्वन्ता भैरवी बाला हस्तौ मां च सदाऽवतु ॥ १८॥
इति ते कथितं पुण्यं त्रैलोक्यमङ्गलं परम् । सारात्सारतरं पुण्यं महाविद्यौघविग्रहम् ॥ १९॥
अस्यापि पठनात्सद्यः कुबेरोऽपि धनेश्वरः । इन्द्राद्याः सकला देवा धारणात्पठनाद्यतः ॥ २०॥
सर्वसिद्धिश्वराः सन्तः सर्वैश्वर्यमवाप्नुयुः । पुष्पाञ्जल्यष्टकं दद्यान्मूलेनैव पृथक् पृथक् ॥ २१॥
संवत्सरकृतायास्तु पूजायाः फलमाप्नुयात् । प्रीतिमन्योऽन्यतः कृत्वा कमला निश्चला गृहे ॥ २२॥
वाणी च निवसेद्वक्त्रे सत्यं सत्यं न संशयः । यो धारयति पुण्यात्मा त्रैलोक्यमङ्गलाभिधम् ॥ २३॥
कवचं परमं पुण्यं सोऽपि पुण्यवतां वरः । सर्वैश्वर्ययुतो भूत्वा त्रैलोक्यविजयी भवेत् ॥ २४॥
पुरुषो दक्षिणे बाहौ नारी वामभुजे तथा । बहुपुत्रवती भूयाद्वन्ध्यापि लभते सुतम् ॥ २५॥
ब्रह्मास्त्रादीनि शस्त्राणि नैव कृन्तन्ति तं जनम् । एतत्कवचमज्ञात्वा यो भजेद्भुवनेश्वरीम् । दारिद्र्यं परमं प्राप्य सोऽचिरान्मृत्युमाप्नुयात् ॥ २६॥
इति श्रीरुद्रयामले तन्त्रे देवीश्वर संवादे त्रैलोक्यमङ्गलं नाम भुवनेश्वरीकवचं सम्पूर्णम् ॥
bhuvaneśvarīkavacam
śrīgaṇeśāya namaḥ | devyuvāca | deveśa bhuvaneśvaryā yā yā vidyāḥ prakāśitāḥ | śrutāścādhigatāḥ sarvāḥ śrotumicchāmi sāmpratam || 1||
trailokyamaṅgalaṃ nāma kavacaṃ yatpuroditam | kathayasva mahādeva mama prītikaraṃ param || 2||
īśvara uvāca | śrṛṇu pārvati vakṣyāmi sāvadhānāvadhāraya | trailokyamaṅgalaṃ nāma kavacaṃ mantravigraham || 3||
siddhavidyāmayaṃ devi sarvaiśvaryasamanvitam | paṭhanāddhāraṇānmartyastrailokyaiśvaryabhāgbhavet || 4||
Om̐ asya śrībhuvaneśvarītrailokyamaṅgalakavacasya śiva ṛṣiḥ , virāṭ chandaḥ , jagaddhātrī bhuvaneśvarī devatā , dharmārthakāmamokṣārthe jape viniyogaḥ | hrīṃ bījaṃ me śiraḥ pātu bhuvaneśī lalāṭakam | aiṃ pātu dakṣanetraṃ me hrīṃ pātu vāmalocanam || 1||
śrīṃ pātu dakṣakarṇaṃ me trivarṇātmā maheśvarī | vāmakarṇaṃ sadā pātu aiṃ ghrāṇaṃ pātu me sadā || 2||
hrīṃ pātu vadanaṃ devi aiṃ pātu rasanāṃ mama | vākpuṭā ca trivarṇātmā kaṇṭhaṃ pātu parātmikā || 3||
śrīṃ skandhau pātu niyataṃ hrīṃ bhujau pātu sarvadā | klīṃ karau tripuṭā pātu tripuraiśvaryadāyinī || 4||
Om̐ pātu hṛdayaṃ hrīṃ me madhyadeśaṃ sadāvatu | krauṃ pātu nābhideśaṃ me tryakṣarī bhuvaneśvarī || 5||
sarvabījapradā pṛṣṭhaṃ pātu sarvavaśaṅkarī | hrīṃ pātu guhyadeśaṃ me namobhagavatī kaṭim || 6||
māheśvarī sadā pātu śaṅkhinī jānuyugmakam | annapūrṇā sadā pātu svāhā pātu padadvayam || 7||
saptadaśākṣarā pāyādannapūrṇākhilaṃ vapuḥ | tāraṃ māyā ramākāmaḥ ṣoḍaśārṇā tataḥ param || 8||
śiraḥsthā sarvadā pātu viṃśatyarṇātmikā parā | tāraṃ durge yugaṃ rakṣiṇī svāheti daśākṣarā || 9||
jayadurgā ghanaśyāmā pātu māṃ sarvato mudā | māyābījādikā caiṣā daśārṇā ca tataḥ parā || 10||
uttaptakāñcanābhāsā jayadurgā''nane'vatu | tāraṃ hrīṃ duṃ ca durgāyai namo'ṣṭārṇātmikā parā || 11||
śaṅkhacakradhanurbāṇadharā māṃ dakṣiṇe'vatu | mahiṣāmarddinī svāhā vasuvarṇātmikā parā || 12||
naiṛtyāṃ sarvadā pātu mahiṣāsuranāśinī | māyā padmāvatī svāhā saptārṇā parikīrtitā || 13||
padmāvatī padmasaṃsthā paścime māṃ sadā'vatu | pāśāṅkuśapuṭā māyo svāhā hi parameśvari || 14||
trayodaśārṇā tārādyā aśvāruḍhā'nale'vatu | sarasvati pañcasvare nityaklinne madadrave || 15||
svāhā vasvakṣarā vidyā uttare māṃ sadā'vatu | tāraṃ māyā ca kavacaṃ khe rakṣetsatataṃ vadhūḥ || 16||
hūm̐ kṣeṃ hrīṃ phaṭ mahāvidyā dvādaśārṇākhilapradā | tvaritāṣṭāhibhiḥ pāyācchivakoṇe sadā ca mām || 17||
aiṃ klīṃ sauḥ satataṃ bālā mūrddhadeśe tato'vatu | bindvantā bhairavī bālā hastau māṃ ca sadā'vatu || 18||
iti te kathitaṃ puṇyaṃ trailokyamaṅgalaṃ param | sārātsārataraṃ puṇyaṃ mahāvidyaughavigraham || 19||
asyāpi paṭhanātsadyaḥ kubero'pi dhaneśvaraḥ | indrādyāḥ sakalā devā dhāraṇātpaṭhanādyataḥ || 20||
sarvasiddhiśvarāḥ santaḥ sarvaiśvaryamavāpnuyuḥ | puṣpāñjalyaṣṭakaṃ dadyānmūlenaiva pṛthak pṛthak || 21||
saṃvatsarakṛtāyāstu pūjāyāḥ phalamāpnuyāt | prītimanyo'nyataḥ kṛtvā kamalā niścalā gṛhe || 22||
vāṇī ca nivasedvaktre satyaṃ satyaṃ na saṃśayaḥ | yo dhārayati puṇyātmā trailokyamaṅgalābhidham || 23||
kavacaṃ paramaṃ puṇyaṃ so'pi puṇyavatāṃ varaḥ | sarvaiśvaryayuto bhūtvā trailokyavijayī bhavet || 24||
puruṣo dakṣiṇe bāhau nārī vāmabhuje tathā | bahuputravatī bhūyādvandhyāpi labhate sutam || 25||
brahmāstrādīni śastrāṇi naiva kṛntanti taṃ janam | etatkavacamajñātvā yo bhajedbhuvaneśvarīm | dāridryaṃ paramaṃ prāpya so'cirānmṛtyumāpnuyāt || 26||
iti śrīrudrayāmale tantre devīśvara saṃvāde trailokyamaṅgalaṃ nāma bhuvaneśvarīkavacaṃ sampūrṇam ||
|
|
|
